今晚英超上演一场伦敦打吡，富咸将会主场迎战车路士。富咸出战伦敦打吡特醒，反观车仔唔单止伤兵满营，进攻组织又差得个围字，初段经常老鼠拉龟冇碇埋手，难怪近期坚旺半场和，不妨追多铺。（Now 621及611周二凌晨3时直播）
富咸今季有射手阿历山大米祖域离队，新加盟前锋鲁尔占美尼斯仍未开斋，整体踢法上较之前保守。单计联赛，富咸开咧後6仗入得5粒，失波虽达10球，但其中5球系失畀曼城，近两仗联赛亦冇失波，防守愈见稳阵，何况近期出战伦敦打吡特醒，先喺8月联赛逼和阿仙奴2比2，跟住英联盃第2圈互射12码淘汰热刺，绝对唔赦中游分子车仔。
另边厢，车仔上月3场联赛1和2负未赢过之余，全部食白果，表现惨不忍睹，直至上周中英联盃第3圈以1比0击败白礼顿，先取得9月首胜同首个士哥。不过一箭定江山嘅前锋尼高拉斯积逊，因累积黄牌够数，今仗要坐波监，虽然佢都系败家仔，但睇番车仔阵中除咗佢之外，正宗中锋就得番伤愈冇耐嘅布查，今场可能要焗住将史达宁移入中路，认真湿滞。
积逊坐波监攻力受削
查实车仔真系问题多多，单系伤兵已多达10人，最新一员系上周中英联盃伤出嘅副队长芝维尔，搞到主帅普捷天奴喊晒口。除此之外，车仔进攻组织太慢，个个企定定等波踢，缺乏跑动走位，令对手更易防范，因此经常出现车仔控制战局，但入肉埋门甚少，头6轮联赛入得5粒，其中5仗开半场和，初段得个围冇啖好食，半场和值得再追。
友情链接